Puhon

Puhon

by Mark Jhon Cardoza Oxillo 

Pagkalami lang damgohon ug pangandoyon, 

Nga kitang duha mag-uban sa tanang higayon,

Kita makigbisug sa pagsulay aron mas malig-on

Ako ug ikaw, sa kalipay ug kalisud nga panahon. 

Apan kining atong gugma, wala pa gyuy siguro,

Kita na ba? Uyab ba ta? Wala sad ko kabalo.

Kung mag-uban ta, kailangan ba nato magtago?

"Basin naay makakita", maoy tubag nimo kanako. 

Kabalo ko's akong limitasyon ug asa ko kutob, 

Maong dili ko magpataka-taka lang ug tunob.

Kay ang gugma murag bangka, pwede mokulob,

Dili sad ni sinina nga pwede mabali pagkasul-ob. 

Parehas tang duha, dili pa andam mosugal,

Kay gugma nato dili pa lig-on sama sa bakal. 

Kulang pa kini sa tam-is, daw murag asukal.

Dapat mura ug lapis, nindot ang pagkatahal. 

Bisag ani atong kahimtang, ako nalipay gihapon,

Nga ikaw akong nakaila ug gitagaan ug higayon.

Atong istorya di pa andam sa uban, dili pa karon, 

Pero andam ko maghulat nga ikaw maakoa puhon. 

oOo

Ay Kog Labda

AY KOG LABDA

by Mark Jhon C. Oxillo

"Ayiiieh", mao ra jud akong malitok,

Sa inyong mga sweet nga lihok.

Inyong gugmang lahi sa ubang tapok,

Daw mura'g bulig sa saging sa kabus-ok.

Kiligon jud ko maglantaw,

Sa inyong duha nga maglakaw.

Bisan init kaayong adlaw,

Kaninyo wala gyuy makabugaw. 

Dili kompleto ang akong semana,

kung dili tamong duha makita.

Daw kamo na ang bitamina,

Sa akong lablayf nga uga.

Mura ko'g nagasubaybay'g drama,

gapangita matag karon ug unya.

Sa mga sunod nga kabanata

Nga di jud dapat ko mabiya.

Pero masakitan sad ko usahay,

pag kamo kay murag gaaway,

Dili pa jud halos magtagdanay.

Pero magbati gihapon madugay.

Hahay, basta gugma na gani,

Di jud mapugngan ang gibati.

Sa'tong kanya-kanyang kinabuhi,

Ana nila, kini ang pinaka-lami.

Para sa uban, kini kay dula-dula,

apan sa uban, kini kay way susama,

tungod wala daw kini gigama

para makasakit sa matag-usa.

Isip inyong kuya slash magtutudlo,

Tambag lang nako alang kaninyo,

Basta ang pag-eskwela iseryoso,

Mosupport jud ko ninyo'g todo.

Ay'g pabayae ang pag-eskwela Dzong,

Ug Dzae, padayon sa pag-usbong.

Timan-i kining akong mga pulong,

sa inyong utok ug dughan ikulong.

Kining akong gibuo nga tula

Kay para sa tanang mobasa

Love, love, love lang ta ha,

Ayaw'g angal, ay kog labda! 

oOo

Istorya ni Dodong ug ni Inday

STORYA NI DODONG UG NI INDAY

by Mark Jhon Oxillo

 Unang kita ko nimo, gabuto akong dughan,

"Dug-dug-dug-dug", mao ra gyud ang madunggan. 

Wala ko katingog, wala ko'y masabtan.

"Love at first sight", maoy ingon sa uban

Hangtod sa pagtulog, ikaw gasamok-samok. 

Ginakilig tungod ikaw ang naa sa utok

Way pakialam, bahalag paakon ug lamok, 

Basta ikaw madamguhan, lalom jud ang hagok.

Akoang nahilbal.an nga kita pareha'g school

Aduna na gyud ko'y higayon nga sa imo maduol.

Tanan nimong hilig akong gi.Google.

Gi.accept ko nimo sa Facebook, mura kog maulol.

Hilabihan akong kalipay nga sa Math kita klasmeyt,

Lami kaayo i.ambak, kung pwede pa lang mosyagit.

Ako imong nailhan ug ikaw akong nalambigit.

Cute kay mo.smile, matabunan ang matang singkit.

Paglabay sa panahon, mas nagkaila tang duha,

Sabay mokaog paniudto pati na sa merienda.

Sweet kay sa klase bahalag masakpan sa maestra

Pero bisag ing-ato ta, gatarong ta pag-skwela.

Karong adlawa, magtulo na ta ka tuig

Atong gugma daw murag saging nga binulig,

Ug mas hubag pa sa paak sa lampinig.

KathNiel, JaDine o AlDub, 'di ta nila magpalupig.

Padayon unta kitang duha nga maghinigugmaay,

Bisan unsang problema nga sa ato molabay

Hangtod diri na lang kutob kay ulaw na gamay

Mao diay kini ang storya ni Dodong ug ni Inday.

oOo

#HappyFebibigMonth

#SpreadTheLove

#NoToBitterBeBetter